الجبهة الوطنية للتغيير … هذا ما أنكره عليً صديقي عندما وضعته شعاراً لي في برنامج المحادثة قائلاً

"و لا الإخوان و لا كفاية إحنا اللي هنصلح"

 

قلت له : نعم و لكن النخبه لها الدور الكبير في توجيه الشارع

رد قائلاً : كلهم عملاء شفت ايمن نور لما تم إعتقاله الإمريكان إعترضوا , و قول لي … واحد كل هدفه في الحياة يعارض الريس و الحكومه و خططها و يطلعها عريانه و كإنها مش بتحقق أي إنجاز تفتكر ممكن أصدقه و أقول إنه حقاني واحد عايز يبدأ من الصفر و يهد كل اللي فات .

 

قلت : أولاً مفيش دليل علي إنهم عملاء و هذه أحدي دعايات الحزب الوطني الكاذبة التي ليس الغرض منها سوي تشويه صورة المعارضة

 

إهتمام أمريكا بنشر الديمقراطية بعد ما ذاقت من نتائج الإرهاب سببه دعمها للإستبداد و النظم الفاسدة ثم إن النظام الحالي فعلاً خرب البلد هما مش بيقولوا هيهدوا كل اللي فات بس الحقيقه إنه مفيش إنجازات أصلاً إتحققت علشان يهدها ..

 

قال لي : أنا موافقك جداً و موافق علي كمية الفساد اللي الناس عايشه فيه و إتعودت عليه بس مش لما نبقي الأول دوله ليها مكانه إقتصـادية …

 

و هنا إنقطع إتصالي به :-

 

أنا جلست مع نفسي لكن أحسست أن الكلام اللي أنا عارفه أمانه و لازم أقوله كتب له رسالة

 

لما تقرأها هتعرف ليه كفايه و الإخوان و المعارضه عموماً بتهاجم مبارك و الحكومه بكل الغيظ ده

هتعرف ليه عبدالحليم قنديل (بالرغم من إني مش متفق معاه في حاجات) يقول أشعر بالعار لأن مبارك رئيساً لمصر … إني أكاد أتقيأ كلما سمعت إسم مبارك .

 

يا سيدي أنت بتقول إننا لازم نكون دوله مكانتها الإقتصاديه كويسه الأول و من وجهة نظري النقطه دي من أهم النقاط اللي لو الشعب المصري قدر يفهمها كويس هيبدأ يتحرك فعلاً و هيعرف ليه إحنا حالنا كده هيحس بأهمية مشاركته في العمل السياسي …

 

الإصلاح الإقتصادي يا عزيزي مرتبط كليا و جزئياً بالإصلاح السياسي و الكلام دا مش إنشاء و لا كلام بيتردد و خلاص دا خلاصة دراسات علمية و تجارب عمليه

 

أولاً : طبقاً للدكتور عبدالمنعم سعيد مدير مركز الأهرام للدراسات الإستراتيجية (و بالمناسبه المركز دا مش تبع المعارضه بل إنه مقرب من الحكومه) بيقول إن السبعين دوله الأكثر تقدما في العالم دول ديمقراطيه .

 

ثانياً : بص لتجارب الهند و الصين و ماليزيا و تركيا و كتيييير جداً من الدول اللي حصل

فيها تطور إقتصادي هائل في السنوات الأخيره محصلش غير لما حصل إصلاح سياسي و ممكن أقول لك تجارب الدول دي

 

الهند أكبر ديمقراطيه في العالم عدد الناخبين 600 مليون تقريبا حوالي 62% من إجمالي عدد السكان و لو شلنا الأطفال و اللي لم يبلغوا سن الإنتخاب هتعرف إن نسبة الناخبين هناك عاليه جداً

الصين لم يحدث تطور إقتصادي حقيقي إلا بعد إعادة إصلاح الحزب الحاكم للسلطه و تخليه عن تفرده بإتخاذ القرار

 

تركيا لما حزب العداله و التنميه كسب الإنتخابات و الجيش لم يتدخل في النتائج حققت معدلات إقتصاديه عاليه جداً بعد ما كانت خلاص بيقولوا تركيا علي حافة الإنتهيار إقتصاديا و بدأت المفاوضات للإنضمام للإتحاد الأوروبي و شرط من شروط الإتحاد قبل الإنضمام إن الدوله تكون ديمقراطية

 

و طبعاً تجربة ماليزيا و مهاتير محمد معروفه و مشهوره

 

ثالثاً : إحنا من إمتي و إحنا بنسمع من الرئيس مبارك كلام عن أولوية الإصلاح الإقتصادي عايز أقولك يا عزيزي إن الكلام ده من سنة 81 من أول خطبه خطبها الرئيس و دلوئتي الحمد لله مستوانا الإقتصادي منهار تماماً و بالأرقام الحقيقيه ممكن أقولهالك و دا دليل قوي علي إن الكلام عن الإصلاح الإقتصادي أولاً دا كلام فارغ و ضحك علي الشعب .

 

لإن ببساطه لما تبقي مجموعه واحده هيا اللي بتحكم البلد بتبقي عارفه إن مفيش حد هيحاسبها و قضايا الفساد تبقي علي ودنه لإن اللي بيجمعهم مصالح شخصيه بالمناسبه طبقاً لتقارير الجهاز المركزي للتعبئه و الإحصاء "مركز حكومي" فيه في مصر 72 ألف قضية فساد سنوياً يعني طبقاً للمركز برضه قضية فساد كل دقيقتين و لو إشتريت أي جريدة معارضة في أي يوم اي عدد لازم تلاقي قضية فساد طبعاً أنا قلت لك في الأول تقرير الجهاز الحكومي علشان متفتكرش إن المعارضه بتلفق تهم و خلاص .

 

بخصوص بقي هجوم المعارضه يا سيدي المعارضه عندهم حق لما يشدوا في الهجوم علي نظام الرئيس مبارك و حكومته لإن الناس دي يا ابني عارفه إيه اللي بيحصل في البلد هما النخبه اللي متابعه من فتره طويله و داخلين في معارك مع النظام من زمان يمكن الشعب مش كده علشان مش متابع أنا معرفش أنت متابع سياسه من زمان و لا لأ بس هقول لك

 

مرشد الإخوان الأستاذ مهدي عاكف بيقول في حوار لجريدة الدستور : لا أمل في مبارك و لا في أبنه و لا في الحزب الوطني

 

إبراهيم عيسي بيقول : مبارك لن يغير كما إنه لن يتغير

 

فاروق الباز "و دا لو متعرفوش عالم مصري في وكالة ناسا للفضاء ماسك رئيس قسم هناك و بيسموه الملك لشدة ذكائه و إكتشافاته الكبيره جداً للأسف مش مستغل في مصر" بيقول : ماضي مصر مشرق و مستقبل مصر مظلم

 

يوسف شاهين بيقول أنا أنصح الشباب بالهجره من مصر (مش متفق معاه أنا طبعاً بس الراجل بيعبر عن لحظة غيظ)

 

و أحمد زويل كان ليه كلمه برضه مش فاكرها

 

الناس دي بتقول كدا ليه هل هما ناس سوداويين و مش شايفين غير نص الكوب الفارغ ؟؟

 

من وجهة نظري لأ بس هما وصلوا لدرجة من فقد الثقه في مبارك و الحزب الوطني لدرجة إنهم مش ممكن يصدقوهم في أي حاجه

 

و عندهم حق لما تبقي من خمسه و عشرين سنه عمال تسمع عن الإصلاح الإقتصادي و إننا عايشين في أزهي عصور الديمقراطيه

 

و الله العظيم كانوا بيقولوا كده في إنتخابات سنة 2000 -يعني من قريب- و أنا ماشي في الشارع الامن قافل اللجان و في مدرعتين كانوا واقفين في ميدان رئيسي و مفيش حد يدخل ينتخب

 

و في سنة 2005 يقولوا تحول ديمقراطي تاريخي و صور الامن و هوا محاصر اللجان ماليه

القنوات الفضائية و في 12 واحد ماتوا برصاص الشرطه علشان حاولوا يدخلوا ينتخبوا بالعافيه و الدكتور حسن الحيوان لو سمعت عنه دا إخوان مسلمين من الشرقيه إتهموه بحيازة اسلحة و بقيادة فرق بلطجه و المحكمه عطيت له براءه مرتين ربنا يرحمه مات الراجل من كام يوم موته طبيعيه

بس بالسكته القلبيه أكيد من اللي شايفه بيحصل في البلد

 

و من خمسه و عشرين سنه بنسمع من الرئيس مبارك عن الإهتمام بمحدودي الدخل و تقارير البنك الدولي بتقول إن معدل الفقر زاد في مصر و إن الفقراء وصلوا لأكثر من ثلث الشعب المصري دي التقارير القديمه و في تقارير تانيه بتقول إنهم وصلوا لخمسين في الميه من الشعب المصري تقريباً روح الريف و الأماكن العشوائيه هتعرف معني الفقر فعلاً لما تلاقي أسر ملهاش دخل ثابت خالص و أسر عدد أفرادها أكثر من خمسه و دخلهم الشهري حوالي 100 جنيه و يمكن أقل كمان …

 

بنسمع عن جذب الإستثمارات و التطور الهائل فيه و إحنا في تقرير البنك الدولي برضه رقم 165 من 175 دوله يتضمنها التقرير يا راجل دا فيه دول و أنا بقرأ التقرير مسمعتش إسمها قبل كده دا إحنا قبلنا في التقرير جنوب أفريقيا و متهيألي كمان قبلنا أفغانستان و الله ما بهزر

 

نسب الأميه و البطاله و المبيدات المسرطنه و المياه الملوثه في تقرير صادر عن مجلس الشعب "يعني مش معارضه" بيقول إن 90% من المياه في مصرملوثه اللي إحنا بنشربها و فيه 100 ألف مصاب بالسرطان سنوياً و إحنا أعلي نسبه للإصابه بفيروس الكبد سي علي مستوي العالم حسب تقارير الأمم المتحدة

 

ميزانية البحث العلمي في مصر 4 مليون جنيه و ميزانية وزارة الداخليه طبعأً 12 ملياااااااااااااار جنيه منهم 2 مليار مصاريف سريه طبعاً علشان المخبرين اللي وصل عددهم لثلاث أرباع المليون شخص مخبر في كل جامع و في كل جامعه و في كل مصلحه و في كل جورنال و في كل وزاره و كل حارة و كل شارع و كل مصنع دوله أمنيه بوليسية …

 

لما تطلع مظاهره لتامر حسني يسيبوها لا مش كده دا لما يتلم مجموعة شباب يعملوا حوادث التحرش في وسط البلد الشرطه متعملش حاجه ووزارة الداخليه تنفي الخبر مع إن الدنيا كلها شافتها و جه الخبر في ييجي خمسين جورنال و قناه و وكالة أنباء علشان تخبي تقصيرها و تلفق التهمه لراجل برئ في بنى مزار علشان تخبي فشلها و أول ما تطلع مظاهره للإخوان و لا كفايه علشان تندد بالعدوان الإسرائيلي علي لبنان و لا بالمجازر الإسرائيلية و لا بالإصلاح السياسي يبقي رد الفعل يبدأ من كردونات أمنية لخراطيم

المياه للرصاص المطاطي للتحرش بالصحفيات و ضربهم اللي كانوا بيتظاهروا ضد تعديل الماده 76 ..

 

البيه وزير الداخليه لما بيسالوه عن التجسس علي التليفونات يقول اللي بيخاف ميتكلمش يا راجل دا في ألمانيا عايزين يحطوا كاميرات مراقبه في الأماكن العامه المطارات و محطات القطارات و المترو في ناس معترضه و بودني سامع واحد بيقول : "أنا لا أريد أن تكون الحكومه علي علم بمكاني في كل ثانيه" الراجل مش عايز حد يخترق خصوصياته و يحس إن فيه حد مراقبه طول الوقت … شفت يا سيدي الفرق بيننا و بينهم ..

 

تفتكر شعب زي الشعب المصري عايش في كل اللي فات ده يقدر ينتج و يبدع و يعمل أي تقدم كل واحد فينا بقي عايز يربي ولاده معندوش طموح أقصي ما يتمناه الهجره لأمريكا أو السفر للخارج و محدش ليه دعوه بالسياسه و البلد بتاعتهم و أنا يعني اللي هغير الكون و لو نزلت في أرض تعبد العجل حش و إديله تفتكر متراقب في كل حركة و حواليه المخبرين في كل مكان و لو نطق هيتسجن و لو تظاهر هيتضرب و لو راح ينتخب ممكن يموت إنسان بيفكر بالطريقه و عايش الحياه دي ممكن يصلح و ممكن يخلي مصر وطننا الحبيب الغالي اللي كل ما أفتكر حاله أتأثر و أحزن تفتكر المواطن ده ممكن يخلي مصر دوله متقدمه متحضره و محترمه ..

 

الكلام ده ما أقصدش بيه التيئيس بالعكس أنا أقصد بيه التحدي لازم ننقذ مصر قبل ما يسرقوها و يودوها في داهيه قبل ما تغرق و تغرب شمسها و منعرفش ننقذها لازم كل واحد فينا يتحرك مصر دي بلدنا من نيلها شربنا و من تربتها أكلنا و بسماها إتظللنا و من هواها إتنفسنا نيلها في دمنا و أمنها هوا أمننا و تقدمها هوا فخرنا أنا مش بهزر و لا بغني أنا بقول كلام ممكن ناس كتير تسخر منه و تقول أنت لسه عايش الشعارات لأ الشعارات هيا بداية الأعمال العظيمة لو إتحولت لأعمال جاده بناءه

 

لازم نقوم يا شعبي لازم تفوق يا مصري أنت حفيد خوفو و رمسيس و عمرو بن العاص و الرسول أوصي بينا و قال إننا خير أجناد الأرض و إننا في رباط ليوم الدين هنا إتهزم الهكسوس و الصليبيين و التتار و الإنجليز و الفرنسيين و اليهود ..

 

هنا نشأ العظام في كل مجال حتي في العصر الحديث أحمد زويل و فاروق الباز و زغلول النجار و مصطفي مشرفه و يوسف القرضاوي و نجيب محفوظ و عباس العقاد و مصطفي كامل و سعد زغلول و محمد عبده و حسن البنا و محمد الغزالي ربنا يرحمهم جميعاً ..

 

 

يا تري أنت هتبقي زي واحد فيهم و لا هنفضل ساكتين و راضيين بالظلم و القهر و الفساد و نسيب مصر تغرق زي ما غرقت العباره و نسيبها تتحرق زي ما حرقوا القطار أو تقع زي ما وقعت الطياره الفاعل مجهول بس معلوم هوا الجاني هوا القاتل النظام المستبد الفاسد ؟؟!!

 

متسمعتش كلام الحكومه يقولوا لك المعارضه عميله متصدقهمش يقولوا لك إحنا بنصلح البلد و الإصلاح مستمر متصدقهمش

 

متقصدش حالة حوار و لا القناه الأولي و الثانيه الإخوان و كفايه ناس وطنيين عايزين يصلحوا إيه اللي يخليهم يقبلوا كل اللي بيحصل لهم ده من غير أجر أو ثمن حب الوطن و حب الإصلاح و عايزين الأجر من ربنا و عايزين ينشروا العداله بين الناس عايزين كل واحد ياخد حقه و يختفي الظلم ..

 

يا تري سامعني يا مصري لا لسه نايم ؟؟؟!!!

إقرأ اللي فات تاني يمكن تصحي …

 

لسه صاحي

 

 

 

ـــــــــــــــــــــــــــــــــــــــــــــــــــــــــ
التصنيفات : إصحي يا نايم | السمات:إصحي يا نايم
أرسل الإدراج  |   دوّن الإدراج